990. 'Ad omne quod prorepere facit humus': quod significet affectiones boni, constat tam ab illis quae praecedunt quam a significatione 'humi' e qua producuntur seu prorepunt; ab illis quae praecedunt, quod ibi de malis et falsis actum, super quae dominaretur homo regeneratus, hic ideo de affectionibus boni quae ei in manus dantur; a significatione 'humi' e qua producuntur seu prorepunt, 'humus' est in genere homo Ecclesiae et quicquid est Ecclesiae; proinde hic quicquid a Domino per internum hominem producitur in externo; ipsa humus est in externo homine, in ejus affectionibus et in ejus memoria: quia apparet sicut homo produceret bona, ideo dicitur 'omne quod humus prorepere facit': sed est apparentia, est per internum hominum a Domino, nam, ut dictum, nihil boni et veri nisi a Domino