10534. Vers. 4-6. Et audivit populus verbum malum hoc, et luxerunt, et non posuerunt aliquis ornatum suum super se. Et dixit Jehovah ad Moschen, Dic ad filios Israelis, Vos populus durus cervice, momento uno ascendero in medio tui, et consumpsero te; et nunc descendere fac ornatum tuum desuper te, et cognoscam quid faciam tibi. Et abripuerunt filii Israelis ornatum suum, a monte Choreb. `Et audivit populus verbum malum hoc, et luxerunt' significat dolorem eorum ob non eminentiam super alios: `et non posuerunt aliquis ornatum suum super se' significat quale externi eorum quod absque Divino: `et dixit Jehovah ad Moschen' significat instructionem: `dic ad filios Israelis, Vos populus durus cervice' significat quod gens illa non receptura sit influxum a Divino: `momento uno (x)ascendero in medio tui, et consumpsero te' significat quod perituri si Divinum influeret apud illos: `et nunc descendere fac ornatum tuum desuper te' significat quale externi illorum quod absque Divino: `et cognoscam quid faciam tibi' significat quod sic aliquid apud illos existere possit: `et abripuerunt filii Israelis ornatum suum' significat deprivationem Divini Veri in externis apud illos: `a monte Choreb' significat in externis cultus, Ecclesiae, et Verbi.