Audiri facite hoc, proferte id usque ad extremitatem terrae, Redemit Jehovah servum suum Jacobum; tum non sitient; in vastitatibus ducet eos, aquas e petra effluere faciet illis, dum findet petram ut effluant aquae, Esaj: XLVIII: 20.21. Sic dixit Jehovah Redemtor Israelis, Sanctus ejus, Esaj: XLIX: 7. Ut sciant omnis caro, quod Ego Jehovah Salvator tuus, et Redemptor tuus fortis Jacobi, Esaj: XLIX: 26. Dixit Jehovah, num abbreviando abbreviata est manus mea, ut non sit Redemptio, aut num non in Me virtus ad eripiendum, vestio coelos atrore, et saccum facio velamen eorum, Esaj: L: 2.3. Redemptio est eripere bonos a malis, et separare malos a bonis, alioquin mali perderent bonos. Nonne Tu qui posuit profunditatem maris viam ut transirent Redempti. Sic Redempti Jehovae revertentur, venientque Zionem cantu, ita ut gaudium aeternitatis super capite eorum, laetitia et gaudium assequantur, fugiant tristitia et gemitus, Esaj: LI: 10.11. Redemtio est repraesentata per transitum Aegyptiorum in filios Israelis per mare Suph. Gratis venditi estis, ideo non per argentum redimemini, Esaj: LII: 9. Personate, cantate simul, vastitates Hierosolymae, quia consolatus est Jehovah populum suum, redemit Hierosolymam, Esaj: LII: 9. Jehovah Zebaoth nomen ejus, et Redemptor tuus Sanctus Israelis, Deus totius terrae vocabitur, Esaj: LIV: 5. Cum misericordia aeternitatis miserebor tui, dixit Redemptor tuus Jehovah, Esaj: LIV: 8. Tunc veniet Zioni Redemptor, Esaj: LIX: 20; agitur de pugna Domini cum infernis a vers: 16 ad 19. Ut scias quod Ego Jehovah Salvator tuus, et Redemtor tuus potens Jacobi, Esaj: LX: 16. [NB.] Vocabunt illos populus Sanctitatis, Redempti Jehovae, Esaj: LXII: 12, de nova Hierosolyma seu Ecclesia, in toto Capite. Pugna Domini cum Infernis et sic ultimum judicium super malos qui vastaverunt Ecclesiam, et sic redemptio, describitur apud Esajam Cap: LXIII: 1 ad 10: quare ibi dicitur, nam dies vindictae in corde meo, et annus redemptorum meorum venerat, vers: 4; et de redemptis, certe populus meus illi, ideo factus est illis in Salvatorem, tum, Angelus facierum Jehovae liberavit eos, ob amorem suum redemit eos, et portavit eos omnibus diebus aeternitatis, vers: 8.9. Hic manifestum quod redemptio sit subjugare inferna, pugnando cum illis, et sic salvandi fideles, ex quibus novum coelum et nova Ecclesia. Tu Pater noster, Abraham non cognoscit nos, et Israel non agnoscit nos, Tu Jehovah Pater noster, Redemptor noster a saeculo nomen [tuum], Esaj: LXIII: 16.