79. Spiritus docti nec intellexerunt quod dixeram, quod Dominus in mundo fuerit Divinum Verum, et quod postea Divinum Bonum, tunc unum cum Patre; quare datum explicare id: --nempe, quod Divinum Verum sit idem cum Divina Intelligentia et Sapientia, nam intellectus est ex veris; et quoque homo dum regeneratur a Domino, intellectus ejus formatur ex veris; et quantum formatur tantum est intelligens: et quod Divinum Bonum sit Divinus Amor, ac amor est (3) voluntatis; quare quantum homo ex veris, quae intellectus, regeneratur, et illa fiunt boni, nempe amoris, tantum regeneratur; ut de Domino, tantum (4) glorificatus, seu factus Divinus, quia ex ipso Divino: quod dicatur Divinum Verum ac Divinum Bonum, est quia dicitur de Deo quod sit ipsum Bonum et ipsum Verum; et quod ex eo est, quod omne bonum amoris et verum intelligentiae apud angelos et apud (5) homines sit ab Ipso.