4290. Redactus dein est in statum infantiae suae, et ostensus tunc qualis fuit, et hoc coram angelis, et demonstratum, quod nequaquam aliter fieri potuisset, cum talis infans, et ostensum quoque, quod singula acta vitae ejus a Domino ducta sint ita, ne in infernum gravissimum se praecipitaret, in quod ruisset, si minimum a providentia Domini, continua, cessavisset. Videre possunt angeli, fere simul, cum ostenditur a Domino, omnia acta vitae alicujus, tam ex illo cum infans, quam ex eodem cum vir; inde quoque scire datum quod Providentia Domini sit in singularissimis. 1749, 2 Junius.