9896. `Et alligabunt pectorale ex annulis ejus ad annulos ephodi': quod significet conjunctionem et conservationem omnium caeli per sphaeram Divini Boni in externis regni spiritualis, constat ex significatione `alligare' quod sit conjunctio et conservatio, de qua in superioribus, ubi de alligatione pectoralis ad ephodum actum est; ex significatione `pectoralis' quod sit repraesentativum omnium caeli, de qua n. 9879, 9887; ex significatione `annulorum' quod sint sphaera Divini Boni per quam conjunctio, de qua n. 9498, 9501, 9887; et ex significatione `ephodi' quod sit Divinum Verum in regno spirituali in forma externa, in quod desinunt interiora, de qua n. 9824, ita omne externum illius regni.