9547. Vers. 31-39. Et facies candelabrum auro puro, solidum fiet candelabrum, scapus ejus, et calamus ejus, scyphi ejus, malogranata ejus, et flores ejus, ex illo erunt. Et sex calami exeuntes ex lateribus ejus, tres calami candelabri ex latere ejus uno, et tres calami candelabri ex latere ejus altero. Tres scyphi amygdalati in calamo uno, malogranatum et flos; et tres scyphi amygdalati in calamo uno [, malogranatum et flos]; ita sex calamis exeuntibus ex candelabro. Et in candelabro quattuor scyphi amygdalati, malogranata ejus et flores ejus. Et malogranatum sub duobus calamis ex eo, et malogranatum sub duobus calamis ex eo, et malogranatum sub duobus calamis ex eo, sex calamis exeuntibus ex candelabro. Malogranata eorum et calami eorum ex ea erunt omnia {1}ejus, solidum unum auro puro. Et facies lucernas ejus septem; et ascendere faciat lucernas ejus, et illuminet e regione facierum ejus. Et forcipes ejus et trullas ejus auro puro. Talentum auri puri faciet illud cum omnibus vasis illis. `Et facies candelabrum' significat caelum spirituale: `auro puro' significat quod ex bono caelesti: `solidum fiet candelabrum' significat quod omne ex bono: `scapus ejus, et calamus ejus, scyphi ejus' significat spiritualia in naturali: `malogranata ejus' significat scientifica boni: `et flores ejus' significat scientifica veri: `ex illo erunt' significat quod ex spirituali quod ex bono caelesti: `et sex calami exeuntes ex lateribus ejus' significat omnia veri ex bono in complexu: `tres calami candelabri ex latere ejus uno, et tres calami candelabri ex latere ejus altero' significat plenum quoad bonum et verum: `tres scyphi amygdalati' significat plenum quoad scientifica ex bono: `in calamo uno` significat potentiam veri ex bono: `malogranatum et flos' significat scientificum boni et scientificum veri: `et tres scyphi amygdalati in calamo uno, malogranatum et flos' significat similia: `ita sex calamis exeuntibus ex candelabro' significat potentiam veri ex bono quoad omnia in caelo spirituali: `et in candelabro' significat medium ejus per quod conjunctio, et ex quo potentiae: `quattuor scyphi amygdalati' significat scientifica veri ex bono: `malogranata ejus et flores ejus' significat scientifica boni et veri: `et malogranatum sub duobus calamis ex eo, et malogranatum sub duobus calamis ex eo, et malogranatum sub duobus calamis ex eo' significat scientificum boni singulis veris: `sex calamis exeuntibus ex candelabro' significat potentiam veri ex bono quoad omnia in caelo spirituali: `malogranata eorum et calami eorum ex eo erunt omnia ejus' significat quod scientifica boni et potentiae ex Divino spirituali, quod a Domino, erunt: `solidum unum auro puro' significat integrum et perfectum quia ex eodem bono: `et facies lucernas ejus septem' significat sancta spiritualia inde: `et ascendere faciat lucernas ejus' significat lucem caeli spiritualis: `et illuminet e regione facierum ejus' significat a Divino Bono Divini Humani Domini: `et forcipes ejus et trullas ejus' significat purificatoria et evacuatoria in naturali: `auro puro' significat etiam ex bono: `talentum auri puri faciet illud cum omnibus vasis illis' significat bonum caeleste a quo bonum spirituale una cum ejus scientificis. @1 eorum IT$