Vers. 1, 2. Tunc cecinit Moscheh et filii Israelis canticum hoc Jehovae, et dixerunt dicendo, Cantabo Jehovae, quia exaltando exaltavit; equum et equitem ejus projecit in mare. Virtus mea, et canticum Jah, et fuit mihi ad salutem; Hic Deus meus, et habitaculum constituam Illi, Deus patris mei, et exaltabo Ipsum. `Tunc cecinit Moscheh et filii Israelis canticum hoc Jehovae' significat glorificationem Domini ab illis qui ab Ecclesia spirituali propter liberationem: `et dixerunt dicendo' significat ita ex influxu: `(x)Cantabo Jehovae' significat quod Domino soli gloria: `quia exaltando exaltavit' significat quod manifestaverit Divinum Suum in Humano: `equum et equitem ejus projecit in mare' significat in eo quod ex sola praesentia Ipsius falsa ex malo damnata sint et conjecta in infernum: `virtus mea' significat quod omne potentiae ab Ipso: `et canticum Jah' significat quod omne fidei et inde gloriae sit ex Divino Vero quod ab Ipso: `et fuit mihi ad salutem' significat quod inde salvatio: `et habitaculum constituam Illi' significat quod in bono quod ab Ipso, erit ut in caelo Suo: `Deus patris mei' significat quod non aliud Divinum fuerit in Ecclesiis antiquis: `et exaltabo Ipsum' significat quod etiam nunc Ipsi cultus Divinus.