7829. Vers. 3-6. Loquimini ad omnem coetum Israelis, dicendo, In decimo mensis hujus et accipient sibi quisque pecudem ad domum patrum, pecudem ad domum. Et si minor est domus prae esse a pecude, et accipiat ille et vicinus illius propinquus ad domum ejus in numero animarum, quisque ad os comedere ejus, numerabitis super pecudem. Pecus integra, mascula, filius anni erit vobis; ex agnis et ex capris accipietis. Et erit vobis ad custodiam usque ad quartum decimum diem mensis hujus; et mactabunt illam omnis [congregatio] coetus Israelis inter vesperas. `Loquimini ad omnem coetum Israelis, dicendo' significat influxum cum informatione omnium qui ab Ecclesia spirituali: `In decimo mensis hujus' significat statum initiationis interiorum: `et accipient sibi quisque pecudem' significat quoad innocentiam: `ad domum patrum, pecudem ad domum' significat secundum bonum speciale cujusvis: `et si minor est domus prae esse a pecude' significat si bonum {1}particulare non satis sit pro innocentia: `et accipiet ille et vicinus illius propinquus ad domum ejus' significat conjunctionem cum bono veri proximo: `in numero animarum, ad os comedere illius, numerabitis super pecudem' significat sic impletionem boni pro innocentia ex totidem veris boni secundum appropriationem ejus: `pecus integra' significat innocentiam immaculatam: `masculam' significat quae fidei charitatis: `filius anni erit vobis' significat statum plenum: `ex agnis et ex capris accipietis' significat bonum innocentiae interius et exterius: `et erit vobis ad custodiam' significat tempus et statum initiationis: `usque ad quartum decimum mensis' significat ad statum sanctum: `et mactabunt illam omnis congregatio coetus Israelis' significat praeparationem ad fruitionem ab omnibus in communi qui ab Ecclesia spirituali: `inter vesperas' significat statum ultimum et primum.