6176. `Et appropinquarunt dies Israelis ad moriendum': quod significet statum mox ante regenerationem, constat ex significatione `appropinquare' quod sit prope esse, ita mox ante; ex significatione `dierum' quod sint status, de qua n. 23, 487, 488, 493, 893, 2788, 3462, 3785, 4850; ex repraesentatione `Israelis' quod sit bonum spirituale, de qua supra n. 6169; et ex significatione `mori' quod sit resurgere et excitari in vitam nempe spiritualem, de qua n. 3326, 3498, 3505, 4618, 4621, 6036, ita regenerari; nam qui regeneratur, is resurgit a morte spirituali et excitatur in novam vitam.