10639. Vers. 12-17. Cave tibi ne forte pangas foedus habitatori terrae super quam tu venis, ne forte fiat in laqueum in medio tui. Quare altaria eorum evertetis, et statuas eorum frangetis, et lucos ejus exscindetis. Quare non incurvabis te deo alteri, nam Jehovah Zelotes nomen Ipsius, Deus Zelotes Ille. Ne forte pangas foedus habitatori terrae, et scortentur post deos eorum, et sacrificent diis eorum, et vocet te, et comedas de sacrificio ejus. Et accipias de filiabus ejus filiis tuis, et scortentur filiae ejus post deos earum, et scortari faciant filios tuos post deos earum. Deos fusilis non facies tibi. `Cave tibi ne forte pangas foedus habitatori terrae super quam tu venis' significat quod non adhaerendum religioso cuicumque in quo malum: `ne forte fiat in laqueum in medio tui' significat seductionem inde in ipso Verbo: `quare altaria eorum evertetis' significat quod malum religiosi istius et inde cultus rejiciendum: `et statuas eorum frangetis' significat quod falsa mali dissipanda: `et lucos ejus exscindetis' significat quod doctrinalia eorum prorsus rejicienda: `quare non incurvabis te deo alteri' significat quod solus Dominus colendus ex fide et amore: `nam Jehovah Zelotes nomen Ipsius, Deus Zelotes Ille' significat si alius colitur quod recedat Divinum Bonum et Divinum Verum: `ne forte pangas foedus habitatori terrae' significat sic conjunctionem cum malo cujusvis religiosi: `et scortentur post deos eorum' significat inde falsa mali: `et sacrificent diis eorum' significat sic cultum ex falsis: `et vocet te, et comedas {1}de sacrificio ejus' significat allectationem, receptionem, et appropriationem falsi ex malo: `et accipias de filiabus ejus filiis tuis' significat conjunctionem affectionum mali cum veris: `et scortentur filiae ejus post deos earum, et scortari faciant filios tuos post deos earum' significat sic profanationem boni et veri: `deos fusilis non facies tibi' significat cultum sui et non Domini. @1 ex IT$