1022. Vers. 9, 10. Et Ego, ecce Ego, erigo foedus Meum cum vobis, et cum semine vestro post vos. Et cum omni anima viva quae cum vobis, ad avem, ad bestiam, et ad omnem feram terrae vobiscum: ab omnibus egredientibus arca, quoad omnem feram terrae. 'Et Ego, ecce Ego erigo foedus Meum' significat Domini praesentiam in charitate: 'cum vobis' significat hominem regeneratum spiritualem: 'et cum semine vestro post vos' significat illos qui e novo creantur: 'cum omni anima viva quae cum vobis' significat in genere omnia quae apud hominem regenerata sunt: 'ad avem' significat in specie ejus intellectualia: 'ad bestiam' in specie ejus nova voluntaria: 'ad omnem feram terrae' ejus inferiora intellectualia et voluntaria quae inde: 'vobiscum' significat, hic ut prius, quae apud hominem regeneratum spiritualem: 'ab omnibus egredientibus ex arca' significat homines Ecclesiae: 'quoad omnem feram terrae' significat homines extra Ecclesiam.