7911. Vers. 21-24. Et vocavit Moscheh omnes seniores Israelis, et dixit ad illos, Protrahite et accipite vobis pecudem gregis juxta familias vestras, et mactate Paesach. Et accipietis fasciculum hyssopi, et intingatis in sanguine qui in pelvi, et attingere faciatis ad superliminare et ad binos postes, de sanguine qui in pelvi; et vos non exibitis quisquam ex ostio domus suae usque ad mane. Et transibit Jehovah ad infligendum plagam Aegypto, et viderit sanguinem super superliminari ei super binis postibus, et praeteribit Jehovah praeter ostium, et non dabit perditori venire ad domus vestras ad infligendum plagam. Et custodietis verbum hoc ad statutum tibi et filiis tuis usque aeternum. `Et vocavit Moscheh omnes seniores Israelis' significat illustrationem intellectus illorum qui ab Ecclesia spirituali per influxum et praesentiam veri Divini: `et dixit ad illos' significat perceptionem: `Protrahite' significat quod cogerent se: `et accipite vobis pecudem gregis' significat ad recipiendum bonum innocentiae: `juxta familias vestras' significat secundum cujusvis veri bonum: `et mactate Paesach' significat praeparationem ad praesentiam Domini, (c)et inde liberationem: `et accipietis fasciculum hyssopi' significat medium externum per quod purificatio: `et intingetis in sanguine' significat sanctum verum quod boni innocentiae: `qui in pelvi' significat quod in bono naturalis: `et attingere facietis ad superliminare et ad binos postes' significat bona et vera naturalis: `de sanguine qui in pelvi' significat sanctum verum quod boni innocentiae in naturali: `et vos non exibitis quisquam ex ostio domus suae' significat quod permanebunt in bono quod a vero non spectandum: `usque ad mane' significat ad statum illustrationis: `et transibit Jehovah' significat praesentiam Divini: `ad infligendum plagam Aegypto' significat unde damnatio illis qui ab Ecclesia in fide separata a charitate fuerunt: `et viderit sanguinem super superliminari et super binis postibus' significat apperceptionem sancti veri quod boni innocentiae in naturali: `et praeteribit Jehovah praeter ostium' significat quod fugiet inde damnatio: `et non dabit perditori venire ad domus vestras' significat quod falsum et malum quae ex infernis ad voluntatem nullatenus {1}accedent: `ad infligendum plagam' significat damnationem quam ipsi sibimet inferunt: `et custodietis verbum hoc ad statutum tibi et filiis tuis usque aeternum' significat quod omne hoc erit secundum ordinem Divinum posthac illis qui ab Ecclesia spirituali. @1 accedet$