7780. `Usque ad primogenitum ancillae quae post molas': quod significet vera falsificata fidei quae postremo loco, constat ex significatione `primogeniti' quod sit fides, de qua mox supra n. 7779; et quia est fides, est verum in complexu, nam verum est fidei quia credendum; ex significatione `ancillae' quod {1}sit affectio exterior veri, seu affectio scientiarum, de qua n. 1895, 2567, 3835, 3849; {2}`ancilla' autem `post molas' est affectio scientiarum maxime externa, nam per `post molas' significatur quod postremo loco est; `post molas' dicitur quia `mola' praedicatur de illis quae sunt fidei; frumentum enim per molas comminuitur in farinam et sic praeparatur ad panem, et per `farinam' significatur verum ex quo bonum, {3}et per `panem' ipsum illud bonum quod inde; ita `sedere ad molas' est addiscere et imbuere talia quae inservitura sunt fidei et {4}per fidem charitati; inde est quod antiqui, cum describerent prima doctrinae fidei rudimenta, descripserint (c)id per `sedere ad molas,' et quae adhuc rudiora essent per `sedere post molas'; quia talia significabantur, idcirco Dominus, ubi de ultimo {5}tempore Ecclesiae docet, dicit, Duae molentes in mola, una assumetur, et altera derelinquetur, Matth. xxiv (x)41;