10407. `Et fecit illud vitulum fusilis': quod significet secundum jucundum amorum illius gentis, constat ex significatione `vituli' quod sit bonum externum seu naturale, de qua sequitur, et ex significatione `fusilis' quod sit cultus factus ad favorem amorum externorum, de qua mox supra n. 10,406; et quia de gente Israelitica in hoc capite agitur, et illa erat in externis absque interno, ita in amoribus {1}externis, ideo dicitur secundum jucundum amorum illius gentis; per `vitulum' enim, {2}ut idolum, significatur id jucundum. [2] Antiqui qui in cultu repraesentativo erant sciebant quid per varia genera animalium significabatur, nam quodlibet animal significationem suam habet, secundum quam etiam apparent in caelo, consequenter secundum quam nominantur in Verbo, et quoque secundum quam adhibita fuerunt in holocaustis et sacrificiis; per `vitulum' significatur bonum innocentiae et charitatis in externo seu naturali homine, videatur n. 9391, 9990, 10,132; at cum non {3} bonum innocentiae et charitatis est, ut apud illos qui in externis sunt absque interno, tunc per `vitulum' significatur jucundum naturale et sensuale, quod jucundum est jucundum voluptatum, cupiditatum, (c)et amorum sui et mundi; {4}hoc jucundum est in quo illi qui in externis absque interno sunt, et quod colunt, nam homo quod amat super omnia, hoc colit; (t)quidem dicunt quod colant Deum universi, sed hoc {5}dicunt ore et non corde; qui tales sunt intelliguntur per illos qui colunt vitulum fusilis. [3] Aegyptii prae aliis fuerunt tales qui quia in scientia correspondentiarum et repraesentationum erant prae aliis gentibus, ideo sibi varia idola fecerunt, ut patet ex idolis Aegyptiacis quae adhuc exstant; sed primarium illis idolum fuit vitulus, per quem significare volebant bonum externum eorum in cultu; sed cum scientia correspondentiarum et repraesentationum, in qua erant prae aliis, apud illos versa fuit in magiam, tunc vitulus induebat significationem contrariam, quae est jucundi amorum externorum; et cum vitulus in templis ponebatur, et pro deo colebatur, significabat tale jucundum in cultu; gens Israelitica [4] quia ex Aegypto secum ferebat idololatricum illud, ideo applicate ad illam gentem per vitulum, cum pro deo ab illis colebatur, significatur jucundum amorum illius gentis in cultu; quales ejus amores fuerunt, constare potest ex illis quae ostensa sunt in locis citatis supra n. 10,396; fuerunt enim tunc sicut hodie, in amore sui et in amore mundi prae omnibus aliis; quod hodie sint in amore maxime terrestri, notum est, amant enim argentum et aurum non propter aliquem usum sed propter ipsum argentum et aurum, qui amor est omnium maxime terrestris, nam est sordida avaritia; amor sui non exstat apud illos, ut appareat, sed latet intus in corde eorum, ut solet apud omnes sordide avaros; quod nullus amor proximi {6}apud illos sit, etiam notum est, et quantum nullus amor proximi est apud aliquem, tantum est ei amor sui. [5] Ex his nunc constare potest quid per vitulum fusilis ab Aharone pro gente illa factum significatur; simile per illum {7}significatur in his locis: apud Jeremiam, Vitula pulcherrima Aegyptus, excidium e septentrione venit, ac mercenarii ejus in medio ejus sicut vituli saginarii, xlvi 20, 21: