20. Quoniam per "Filium Dei" intelligitur Dominus quoad Humanum, quod in mundo suscepit, quod est Divinum Humanum, patet quid intelligitur per quod Dominus toties dixerit, quod "missus sit a Patre in mundum," et per quod "exiverit a Patre:" per quod "missus sit a Patre in mundum," intelligitur quod a Jehovah Patre conceptus sit. Quod non aliud per "mitti" et "missum a Patre" intelligatur, constat ex omnibus locis, ubi etiam dicitur quod voluntatem Patris et opera Ipsius faceret; quae erant, quod vinceret inferna, glorificaret Humanum, doceret Verbum, et novam ecclesiam instauraret: quae non potuerunt fieri, nisi quam per Humanum conceptum a Jehovah, et natum a Virgine; hoc est, nisi Deus Homo factus sit. Evolve loca ubi dicitur "mitti" et "missus," et videbis (Ut Matth. x. 40; cap. xv. 24: Marc. ix. 37; Luc. iv. 43; cap. ix. 48; cap. x. 16: Joh. iii. 17, 34; cap. iv. 34; cap. v. 23, 24, 36, 37, 38; cap. vi. 29, 39, 40, 44, 57; cap. vii. 16, 18, 28, 29; cap. viii. 16, 18, 29, 42; cap. ix. 4; cap. xi. 41, 42; cap. xii. 44, 45, 49; cap. xiii. 20; cap. xiv. 24; cap. xv. 21; cap. xvi. 5; cap. xvii. 3, 8, 21, 23, 25; cap. xx. {1}):