720. Sed usque non credendum est, quod Dominus illis qui indigne accedunt, claudat caelum; hoc non facit ulli homini usque ad extremum vitae ejus in mundo; sed quod homo sibi ipsi illud claudat; quod facit per rejectionem fidei et per malum vitae. Sed usque homo jugiter tenetur in statu possibili paenitentiae et conversionis; nam Dominus perpetuo adest et urget ut recipiatur; dicit enim, "Consisto ad januam et pulso; si quis audiverit vocem meam, et aperuerit, ...ingrediar,...et cenabo cum illo et ille mecum" (Apoc. iii. 20). Quare in culpa est ipse homo, qui non aperit januam. Aliter fit post mortem; tunc caelum clausum est, et non apertibile illis, qui usque ad finem vitae indigne ad Sanctam Mensam accesserunt nam tunc interiora mentis illorum fixata et constabilita sunt.