686. In Verbo dicitur, quod Dominus Deus noster Redemptor baptizet Spiritu Sancto et Igne, quod per id intelligatur, quod Dominus regeneret hominem per Divinum Verum fidei, et per Divinum Bonum amoris seu charitatis, videatur supra (in hoc art. n. I [vel totius operis n. 684]). Illi qui regenerati sunt per Spiritum Sanctum, hoc est, per Divinum Verum fidei, in caelis distincti sunt ab illis qui regenerati sunt per Ignem, hoc est, per Divinum Bonum Amoris. Illi qui per Divinum Verum fidei regenerati sunt, in caelo incedunt in vestibus albis byssinis, et vocantur angeli spirituales; at qui regenerati sunt per Divinum Bonum amoris, incedunt in vestibus purpureis, et vocantur angeli caelestes. Illi qui incedunt induti vestibus albis, intelliguntur per hos: "Sequuntur" Agnum "vestiti byssino albo ....et mundo" (Apoc. xix. 14). "Ambulabunt Mecum in albis" (Apoc. iii. 4; tum vii. 14). "Angeli in sepulchro Domini visi in vestibus albis et splendentibus" (Matth. xxviii. 3; Luc. xxiv. 4). Fuerunt ab hoc genere; nam "byssinum" significat justitias sanctorum (Apoc. xix. 8. ubi hoc aperte dicitur). Quod "vestes" in Verbo significent vera, ac "vestes albae" et "byssinae" Divina vera, videatur Apoc. Revel. (n. 379), ubi id ostensum. Quod illi, qui etiam regenerati sunt per Divinum Bonum amoris, sint in vestibus purpureis, est quia purpura est color amoris, quem trahit ex igne solis et ejus rubedine, per quem significatur amor (videatur Apocalypsis Revelata, n. 468, 725). Quoniam "vestes" significant vera, ideo ille qui inter vocatos inventus est non indutus vestibus nuptiarum, ejectus est et conjectus est in tenebras exteriores (Matth. xxii. 11-13).