288. In Verbo saepius nominatur "lex;" et dicetur quid per illam in stricto sensu intelligitur, et quid per illam in latiori, et quid in latissimo. In stricto sensu per "legem" intelligitur decalogus, in latiori intelliguntur statuta per Mosen filiis Israelis data, et in latissimo intelligitur totum Verbum. Quod per "legem" in stricto sensu intelligatur decalogus, notum est: quod autem per "legem" in latiori sensu intelligantur statuta per Mosen Filiis Israelis data, constat ex singulis statutis in [1]Levitico, quod dicantur "lex:" ut, "Haec lex sacrificii" (Lev. vii. 1): "Haec lex sacrificii pacificorum" (Lev. vii. 7, 11):
"Haec lex minchae" (Lev. vi. 7. seq. [B.A. 14, seq.]). "Haec lex pro holocausto, pro mincha, pro sacrificiis peccati et reatus, pro impletionibus" (Lev. vii. [2]37). "Haec lex bestiae et avis" (Lev. xi. 46, seq.). "Haec lex parientis pro filio et filia" (Lev. xii. 7). "Haec lex leprae" (Lev. xiii. 59; xiv. 2, 32, 54, 57). "Haec lex fluxu affecti" (Lev. xv. [3]32). "Haec lex zelotypiae" (Num. v. 29, 30). "Haec lex Naziraei" (Num. vi. 13, 21). Haec lex mundationis (Num. xix. 14). Haec lex de vacca rufa (Num. xix. 2). "Lex pro rege" (Deutr xvii. 15-19). Immo totus Liber Mosis vocatur "lex" (Deutr. xxxi. 9, 11, 12, 26; praeter etiam in Novo Testamento, ut Luc. ii. 22; xxiv. 44; Joh. i. 46 [B.A. 45]; vii. 22, 23; viii. 5; et alibi). Quod haec statuta per "opera legis" intelligantur a Paulo, ubi dicit, Quod homo fide justificetur sine operibus legis (Rom. iii. 28). manifeste patet a sequentibus ibi; tum ex verbis ejus ad Petrum, quem increpavit quod judaizaret, ubi ter in uno versu dicit Quod nemo per opera legis justificetur (Gal. ii. 14, [4]16). Quod per "legem" in latissimo sensu intelligatur totum Verbum, patet ex his: Jesus dixit, "Nonne scriptum est in lege vestra, ...dii estis?" (Joh. x. 34). hoc scriptum est Psalm. [5]lxxxii 6. "Respondit.. turba, Nos audivimus ex lege, quod Christus maneat in aeternum" (Joh. xii. 34):
hoc scriptum est Psalm. lxxxix. 30 [B.A. 29]; Psalm. cx. 4; Dan. vii. 14. "Ut impleretur verbum scriptum in lege illorum, Odio habuerunt Me sine causa" (Joh. xv. 25):
hoc scriptum est Psalm. xxxv. 19. Dixerunt Pharisaei, "Num quis ex principibus credidit in Ipsum? ....Sed turba quae non novit legem...." (Joh. vii. 48, 49). "Facilius.. est caelum et terram transire, quam legis unum apicem cadere (Luc. [1]xvi. 17). Per "legem" ibi intelligitur tota Scriptura Sacra: praeter in mille locis apud Davidem.
This page is part of 
© 2000-2001 The Academy of the New Church