643. "Habens super capite Suo coronam auream, et in manu Sua falcem acutam," significat Divinam Sapientiam ex Divino Amore Ipsius, ac Divinum Verum Verbi.--Quod per "coronam super capite" significetur sapientia, videatur supra (n. 189, 252); et per "coronam auream," sapientia ex amore (n. 235); et quia visa est super capite Filii Hominis seu Domini, per "coronam auream" significatur Divina Sapientia ex Divino Amore Ipsius. Quod per "falcem" significetur Divinum Verum Verbi, est quia per "messem" significatur status Ecclesiae quoad Divinum Verum, hic ultimus ejus status; et inde per "metere," quod fit per falcem, hic significatur statui Ecclesiae finem imponere, ac judicium facere; et quia haec fiunt per Divinum Verum Verbi, ideo hoc per "falcem" significatur; et per "falcem acutam," id exacte et exquisite. Per "falcem" simile significatur quod per "gladium," "machaeram" et "romphaeam;" sed "falx" dicitur ubi agitur de messe, at "gladius" ubi agitur de bello: quod per "gladium," "machaeram," et "romphaeam" significetur Divinum Verum pugnans contra falsa, et vicissim, videatur supra (n. 52, 108, 117).