502. Homo, qui per falsa de spiritualibus ecclesiae factus est naturalis, non potest aliter de Divina omnipotentia cogitare, quam quod sit supra ordinem, ita de omnipotentia Divina absque ordine, quare in vesana haec laberetur: Cur adventus Domini in mundum, et cur sic redemptio, cum Deus ex sua omnipotentia potuisset idem e caelo, ut super terra, efficere: cur per redemptionem non salvavisset totum humanum genus nullo exempto, et cur diabolus postea possit valere supra Redemptorem apud hominem: cur infernum: numne Deus ex omnipotentia sua potuisset et possit id delere: aut omnes inde educere et facere angelos caeli? Cur Ultimum judicium; numne potest omnes hircos e sinistris transferre ad dextrum, et facere illos oves Cur angelos draconis et ipsum draconem dejecit e caelo, et non mutavit illos in angelos Michaelis: cur non his et illis dat fidem, et imputat justitiam Filii, et sic remittit peccata, et illos justificat et sanctificat; cur non bestias terrae, aves caeli, et pisces maris facit loqui, et illis dat intelligentiam, et simul cum hominibus introducit in caelum; cur non totum orbem terrarum fecerat, aut adhuc facit, Paradisum, in quo nulla esset arbor scientiae boni et mali, nec serpens, et ubi omnes colles fluerent generosis mustis, et producerent aurum et argentum, utrumque nativum, utque omnes ibi in jubilis et cantibus, et sic in perpetuis festivitatibus et gaudiis, ut imagines Dei, viverent: nonne haec forent digna Deo omnipotente? Praeter similia alia. Sed, mi amice, omnia illa sunt vaniloquia. Divina omnipotentia non est sine ordine; Ipse Deus est Ordo; et quia ex Deo, etiam ex ordine, in ordine, et ad ordinem, omnia creata sunt. Est ordo in quem homo factus est, qui est ut ex libero arbitrio in spiritualibus ejus benedictio aut ejus maledictio pendeat; nam, ut supra dictum est, homo absque libero arbitrio non potuit creari, ne quidem bestia, avis et piscis; sed bestiae in solo libero arbitrio naturali, at homo in libero arbitrio naturali et simul spirituali.