16. SCIAGRAPHIA DOCTRINALIUM NOVAE ECCLESIAE. I. Sequitur nunc summaria Expositio Doctrinae Novae Ecclesiae, quae per Novam Hierosolymam in Apocalypsi, Cap. XXI et XXII intelligitur: haec Doctrina, quae non modo est fidei sed etiam vitae, in ipso Opere. dispescetur in Tres Partes. PRIMA PARS docebit I. De Domino Deo Salvatore, et de Divina Trinitate in Ipso. II. De Scriptura Sacra, et de utroque ejus Sensu, Naturali et Spirituali, ac de Sanctitate ejus inde. III. De Amore in Deum, et de Amore erga proximum, et de Concordantia illorum. IV. De Fide, et ejus Conjunctione cum binis illis amoribus. V. Doctrina vitae ex praeceptis Decalogi. VI. De Reformatione et Regeneratione. VII. De Libero Arbitrio, et de Cooperatione hominis cum Domino per illud. VIII. De Baptismo. IX. De Sancta Caena. X. De Caelo et Inferno. XI. De Conjunctione hominum cum illis, et de statu vitae illorum post mortem secundum conjunctionem. XII. De Vita Aeterna. SECUNDA PARS aget I. De Consummatione Saeculi, seu fine Ecclesiae hodiernae. II. De Adventu Domini. III. De Ultimo Judicio. IV. De Nova Ecclesia, quae est Nova Hierosolyma. TERTIA PARS demonstrabit DISCORDANTIAS dogmatum Ecclesiae hodiernae et Ecclesiae novae. Sed circa has hic aliquantum morabimur, ex causa quia creditur a Clero et a Laico, quod Ecclesia hodierna sit in ipsa luce Evangelii, ac in ejus veritatibus, quae infirmari, convelli et impugnari nequeunt, ne quidem ab Angelo, si quis e Caelo descenderet: Ecclesia hodie nec videt aliud, quia subtraxit intellectum a fide, et usque dogmata confirmavit per quendam visum sub intellectu, ac falsitates ibi possunt confirmari, usque ut appareant sicut veritates, ac falsitates ibi confirmatae faenerantur lucem fallacem, coram qua lux veritatum apparet sicut caligo. Propter hanc causam hic aliquantum morabimur, Discordantias adducendo, et illas per breves notas illustrando, ut illae coram Intellectu per caecam fidem non occluso videantur sicut in luce crepusculi, et deinde matutae, et demum in ipso Opere in die. Discordantiae in genere sunt hae.