DE

DIVINO AMORE

[ET DE

DIVINA SAPIENTIA]

------------

PARS TERTIA

QUOD IN MUNDO SPIRITUALI SINT ATHMOSPHAERAE, AQUAE ET TERRAE, QUEMADMODUM IN MUNDO NATURALI; SED QUOD ILLAE SINT SPIRITUALES, HAE AUTEM NATURALES. Quod Mundus spiritualis et Mundus naturalis similes sint, cum sola differentia, quod omnia et singula Mundi spiritualis sint spiritualia, ac omnia et singula Mundi naturalis sint naturalia, in antecedentibus dictum est, et in Opere de COELO ET INFERNO ostensum. Quoniam duo illi Mundi similes sunt, ideo in utrisque sunt Athmosphaerae, Aquae et Terrae, quae sunt communia, per quae et ex quibus omnia et singula cum infinita varietate existunt.