9806. `Et tu appropinquare fac ad te Aharonem fratrem tuum quod significet conjunctionem Divini Veri cum Divino Bono in Divino Humano Domini, constat a repraesentatione `Moschis' qui hic appropinquare {1}faceret ad se Aharonem, quod sit Dominus quoad Divinum Verum, de qua n. 6752, 6771, 7014, 9372, ex significatione `appropinquare' quod sit conjunctio et praesentia, de qua n. 9378, ex repraesentatione `Aharonis' quod sit Dominus quoad Divinum Bonum, de qua sequitur, et ex significatione `fratris' quod sit bonum, de qua n 3303, 3803, 3815, 4121, 4191, 5686, 5692, 6756; (m)ex his patet quod per quod `Moscheh appropinquare faceret ad se Aharonem fratrem suum' significetur conjunctio Divini Veri tum Divino Bono in Domino; quod in Divino Humano Ipsius, est quia Ipsum Id erat, in quo conjunctio illa facta est; Dominus enim Humanum Suum primum fecerat Divinum Verum, postea Divinum Bonum, videantur citata n. 9199, 9315.(n) Quod Aharon electus fuerit ut fungeretur sacerdotio, fuit causa quia erat frater Moschis, sic enim simul repraesentabatur fraternitas Divini Veri ac Divini Boni in caelo, nam prout supra dictum est, per Moschen repraesentabatur Divinum Verum, et per Aharonem Divinum Bonum. 2 Omnia in universo, tam caelo quam mundo, se referunt ad bonum et ad verum ut sint aliquid, bonum enim est Esse veri, et verum est Existere boni; quapropter bonum absque vero non Existit, et verum absque bono non Est; inde patet quod conjuncta erunt; conjunctio illorum repraesentatur in Verbo per binas conjuges, et quoque per binos fratres; per binas conjuges quando agitur de conjugio caelesti, quod est boni et veri, ac de successiva derivatione inde; per binos fratres quando agitur de bino ministerio, quod est judicii et cultus; qui fungebantur ministerio judicii vocabantur judices, postea reges, qui autem fungebantur ministerio cultus vocabantur sacerdotes; et quia omne judicium fit per verum, et Omnis cultus ex bono, ideo per `judices' in Verbo significatur in sensu abstracto a persona verum ex bono, per 'reges' autem verum ex quo bonum, ac per `sacerdotes' significatur ipsum bonum; inde est quod Dominus in Verbo dicatur Judex, tum Propheta, ut et Rex, ubi agitur de vero, at Sacerdos ubi de bono; pariter {2}Christus, Unctus, seu Messias, tum de vero, at Jesus seu Salvator cum de bono. Ob illam fraternitatem, quae est veri quod judicii, ac boni quod 3 cultus, Aharon frater Moschis {3} electus est {4}ut sacerdotio fungeretur; quod per `Aharonem et ejus domum' ideo significetur bonum, constat apud Davidem, Israel, confide in Jehovah; Hic est auxilium eorum et scutum eorum; domus Aharonis, confidite in Jehovah; Hic auxilium eorum et scutum eorum. Jehovah recordatus est nostri, benedicit; (x)benedicet domui Israelis, benedicet domui Aharonis, Ps. cxv 9, 10, 12:
apud eundem, Dicat nunc Israel {5}quod in aeternum misericordia Ipsius; dicant nunc domus Aharonis {5}quod in aeternum misericordia Ipsius, Ps. cxviii [2,] 3:
apud eundem, Domus Israelis, benedicite Jehovae; domus Aharonis, benedicite Jehovae, Ps. (x)cxxxv 19;
`domus Israelis' pro illis qui in veris sunt, 'domus Aharonis' pro illis qui in bonis, nam in Verbo ubi agitur de vero etiam agitur de bono, ob conjugium caeleste, n. 9263, 9314; quod `domus Israelis' sint qui in veris, videatur n. 5414, 5879, 5951, 7956, 8234: apud eundem, 4 Jehovah misit (x)Moschen servum suum, Aharonem quem elegit, Ps. cv 26;
Moscheh dicitur `servus' quia servus praedicatur {6}de veris, n. 3409, {7}et electus {6}de bono, n. 3755 fin.: apud eundem, Ecce quam bonum et jucundum habitare fratres etiam una! sicut oleum bonum super capite descendens in barbam, barbam Aharonis, quod descendit super os vestium illius, Ps. {8}cxxxiii [1, 2,] 3;
qui non scit quid significat 'frater,' tum quid `oleum,' quid `caput,' quid `barba,' quid `vestes,' {9}ut et quid repraesentat `Aharon,' non capere potest cur talia comparata sunt cum {10}cohabitatione fratrum, nam quid oleum descendens a capite in barbam Aharonis, et inde in ejus vestes, simile habet cum {11}concordia fratrum; sed {12}similitudo comparationis patet ex sensu interno, in quo agitur de influxu boni in {13}vera, ac ita describitur illorum fraternitas; `oleum' enim est bonum, `caput Aharonis' est intimum boni, `barba' est maxime externum ejus, `vestes' sunt vera, `descendere' est influxus; inde {14}liquet quod per illa verba significetur influxus boni ab interioribus ad exterior in vera, et ibi conjunctio; quis absque sensu interno videre potest quod {15} illis verbis ea caelestia insint? `oleum' quod sit bonum amoris videatur n. 886, 4582, 4638, 9780, `caput' quod sit intimum, n. 5328, 6436, 7859, 9656, `barba' quod sit maxime externum, patet apud Esaiam vii 20, xv 2; apud Jeremiam xlviii 37; et apud Ezechielem v 1; `vestes' quod sint vera, n. 2576, 4545, 4763, 5319, 5954, 6914, 6917, 9093, 9212, 9216; {16}quod `Aharon' sit caeleste bonum, videatur supra. 5 Ex eo quod Aharon electus sit {17}ad fungendum sacerdotio, ita ad ministrandum sanctissima, comprehendi potest quomodo cum repraesentationibus in Ecclesia Judaica se habuerat, quod nempe non spectaverint personam quae repraesentabat, sed rem quae repraesentabatur ita quod rem sanctam, immo sanctissimam, repraesentare potuerint personae quarum interiora immunda, immo (x)idololatrica fuerunt, modo externa, cum erant in cultu, disposita ad sanctitatem fuerunt, qualis Aharon {18}fuerat, constare potest ex his apud Moschen, Aharon sumpsit e manu {19}filiorum Israelis aurum, et formavit illud caelo, fecitque illud vitulum fusilis: et exstruxit Aharon altare coram eo, et proclamavit Aharon, et dixit, Festum Jehovae cras, Exod. xxxii 4, 5, 25:
et alibi apud eundem, Contra Aharonem ira motus est Jehovah valde ad perdendum eum; oravi vero etiam pro Aharone in tempore illo, Deut. ix 20;
quod repraesentativa Ecclesiae apud gentem Israeliticam et Judaicam {20}non spectaverint personas sed ipsas res, videantur citata n. 9229. @1 After se$ @2 Christus seu Unctus$ @3 i, qui Judex et Propheta,$ @4 in sacerdotem$ @5 quia$ @6 ex IT$ @7 at$ @8 133$ @9 tum$ @10 unanimitate$ @11 concordi cohabitatione$ @12 ipsa similitudo constat$ @13 verum$ @14 patet$ @15 i in$ @16 Aharon enim est qui in coelesti bono sunt$ @17 in sacerdotem$ @18 fuerit$ @19 eorum$ @20 spectaverint res sanctas et non personas$
This page is part of 
© 2000-2001 The Academy of the New Church