Vers. I, 2. Et ad Moschen dixit, Ascende ad Jehovam, tu et Aharon, Nadab et Abihu, et septuaginta de senioribus Israelis, et incurvetis vos e longinquo. Et appropinquabit Moscheh solus ille ad Jehovam, et illi non appropinquabunt, et populus non ascendent cum illo. `Et ad Moschen dixit' significat quod concernit Verbum in communi: `Ascende ad Jehovam' significat conjunctionem cum Domino: `tu et Aharon' significat Verbum in sensu interno et externo: `Nadab et Abihu' significat doctrinam ex utroque: `et septuaginta de senioribus Israelis' significat praecipua vera Ecclesiae quae Verbi seu doctrinae concordantia cum bono: `et incurvetis vos e longinquo' significat humiliationem et adorationem ex corde, et tunc influxum Domini: `et appropinquabit Moscheh solus ille ad Jehovam' significat conjunctionem et praesentiam Domini per Verbum in communi: `et illi non appropinquabunt' significat non conjunctionem et praesentiam separatam: `et populus non ascendet cum illo' significat plane non conjunctionem cum externo absque interno.