9302. Vers. 20-30. Ecce Ego mitto angelum ante te, ad custodiendum te in via, et ad perducendum te ad locum quem praeparavi. Custodi a facie ejus et audi vocem ejus, ne exacerbes eum, quia non feret praevaricationem vestram, quia nomen Meum in medio ejus. Quia si audiendo audiveris vocem ejus et feceris omne quod loquar {1}, inimicum agam in inimicos tuos, et hostem agam in hostes tuos. Cum iverit angelus Meus ante te, et perduxerit te ad Emorraeum, et Chittaeum, et Perisaeum, et Cananaeum, Chivaeum, et Jebusaeum, et excidero illum, non incurvabis te diis illorum, et non servies illis, et non facies secundum opera illorum, quia destruendo destrues illos, et confringendo confringes statuas illorum. Et servietis Jehovae Deo vestro, et benedicet pani tuo et aquis tuis, et removebo morbum e medio tui. Non erit abortiens et sterilis in terra tua; numerum dierum tuorum implebo. Terrorem Meum mittam ante te, et turbabo omnem populum ad quos veneris, et dabo omnes inimicos tuos ad te cervicem. Et mittam crabronem ante te, et expellet Chivaeum, Cananaeum, et Chittaeum ab ante te. Non expellam illum ab ante te in anno uno, ne forte sit terra desolata, et multiplicetur super te fera agri. Parum parum expellam illum ab ante te, usque dum fructificeris et heredites terram. `Ecce Ego mitto angelum ante te' significat Dominum quoad Divinum Humanum: `ad custodiendum te in via' significat Ipsius providentiam et custodiam a falsis mali: `ad perducendum te ad locum quem praeparavi' significat introductionem ab Ipso in caelum secundum bonum vitae et fidei: `custodi a facie ejus' significat timorem sanctum: `et audi vocem ejus' significat oboedientiam praeceptorum quae ab ipso: `ne exacerbes eum' significat aversionem ab ipso per falsa ex malo: `quia non feret praevaricationem vestram' significat quia illa repugnant veris ex bono: `quia nomen Meum {2} in medio ejus' significat quod ex Ipso omne bonum amoris et verum fidei: `quia si audiendo audiveris vocem ejus' significat instructionem de praeceptis fidei, et receptionem: `et feceris omne quod loquar {3}' significat obsequium ex fide et amore: `inimicum agam in inimicos tuos' significat quod Dominus avertet omnia falsa ex malo: `et hostem agam in hostes tuos' significat quod avertet omnia mala ex quibus falsa: `cum iverit angelus Meus ante te' significat vitam secundum praecepta Domini: `et perduxerit te ad Emorraeum, et Chittaeum, et Perisaeum, et Cananaeum, Chivaeum, et Jebusaeum, et excidero illum' significat cum Dominus tutatus sit contra mala et falsa infestantia Ecclesiam, et haec amoverit: `non incurvabis te diis illorum' significat quod falsa mali non colenda: `et non servies illis' significat quod nec oboedienda: `et non facies secundum opera illorum' significat quod mala vitae non sectanda: {4} `quia destruendo destrues illos' significat quod mala prorsus amovenda: `et confringendo confringes statuas illorum' significat quod similiter falsa cultus: `et servietis Jehovae Deo vestro' significat cultum solius Domini: `et benedicet pani tuo et aquis tuis' significat incrementum boni amoris et veri fidei: `et removebo morbum e medio tui' significat tutelam a falsificationibus veri et ab adulterationibus boni: `non erit abortiens et sterilis in terra tua' significat quod bona et vera suo ordine in continua progressione procedent: `numerum dierum tuorum implebo' significat usque ad statum plenum: `terrorem Meum mittam ante te' significat terrorem illorum qui in malis falsi pro veris boni: `et turbabo omnem populum' significat consternationem omnium falsorum: `ad quos veneris' significat ex praesentia Domini: `et dabo omnes inimicos tuos ad te cervicem' significat falsorum fugam et damnationem: `et mittam crabronem ante te' significat formidinem illorum qui in falsis mali {5}: `et expellet Chivaeum, Cananaeum, et Chittaeum ab ante te' significat fugam falsorum ex malis: `non expellam illum ab ante te in anno uno' significat non fugam seu remotionem (c)eorum festinam: `ne forte sit terra desolata' significat deficientiam tunc et parum vitae spiritualis: `et multiplicetur super te fera agri' significat affluxum falsorum ex jucundis amorum sui et mundi: `parum parum expellam illum ab ante te' significat remotionem per gradus secundum ordinem: `usque dum fructificeris' significat secundum incrementum boni: `et heredites terram' significat dum in bono, ita regeneratus. @1 loquor IT$ @2 i est$ @3 loquor IT$ @4 A has the following note written in m: quod destruerentur habitatores Canaanis erat propter repraesentativum Ecclesiae institutum, nam gentes repraesentabant mala et falsa, ac omnes ritus illorum, Judaei bona et vera Ecclesiae, quae simul esse ***, et quae Judaei proxissimi essent ad talia, et sic *** repraesentiva [repraesentativa intended] Judaeci, quia *** *** in externis$ @5 ex malo altered to mali A, ex malo IT, cp n. 9331$