9148. Vers. 6-14. Quando dederit vir socio suo argentum vel vasa ad custodiendum, et furto ablatum fuerit e domo viri, si deprehensus fur, rependet duplum. Si non deprehensus fur, adducetur dominus domus ad Deum, annon miserit manum suam in opus socii sui. Super omni verbo praevaricationis, super bove, super asino, super pecude, super veste, super omni perdito, quod dixerit quod hoc illud, usque ad Deum veniet verbum amborum illorum, quem condemnaverint Deus, rependet duplum socio suo. Quando dederit vir socio suo asinum, vel bovem, vel pecudem, et omnem bestiam ad custodiendum, et moriatur aut frangatur, aut captivum abducatur, nemine vidente, juramentum Jehovae erit inter ambos illos, annon miserit manum suam in opus socii sui, et sumpserit dominus ejus, et non rependet. Et si furando furto ablatum fuerit ab illo, rependet domino ejus. Si discerpendo discerptum fuerit, adducet illi testem, discerptum non rependet. [Et] quando commodato petiverit vir ex socio suo, et frangatur vel moriatur, dominus ejus haud cum illo, rependendo rependet. Si dominus ejus cum illo, non rependet; si mercenarius ille, veniet in mercede sua. `Quando dederit vir socio suo argentum aut vasa ad custodiendum' significat vera ex bono et scientifica correspondentia in memoria: `et furto ablatum fuerit e domo viri' significat jacturam illorum inde: `si deprehensus fur' significat recordationem: `rependet duplum' significat restitutionem ad plenum: `si non deprehensus fur' significat si ablati nulla recordatio: `adducetur dominus domus ad Deum' significat inquisitionem ex bono: `annon miserit manum suam in opus socii sui' significat num in illud intraverit {1}: `super omni verbo praevaricationis' significat quodcumque damnum ac quamcumque jacturam: `super bove, super asino, super pecude' significat boni et veri exterioris et interioris `super veste' significat veri sensualis: `super omni perdito, quod dixerit quod hoc illud' significat omne ambiguum: `usque ad Deum veniet verbum amborum illorum, quem condemnaverint Deus' significat inquisitionem et dijudicationem per verum: `rependet duplum socio suo' significat emendationem ad plenum: `quando dederit vir socio suo asinum, vel bovem, vel pecudem, et omnem bestiam ad custodiendum' significat verum et bonum exterius et interius, ac omne quod est affectionis illorum, in memoria: `et moriatur aut frangatur' significat jacturam vel damnum: `aut {2} captivum abducatur' significat remotionem: `nemine vidente' significat de (x)quo mens non conscit: `juramentum Jehovae erit inter ambos illos' significat inquisitionem per vera ex Verbo de omnibus et singulis illis: `annon miserit manum suam in opus socii sui, et sumpserit dominus ejus' significat conjunctionem sub {3} bono: `et non rependet' significat quod non damnum: `et si furando furto ablatum fuerit ab illo' significat si jactura: `rependet domino ejus' significat restitutionem pro illo: `si discerpendo discerptum fuerit' significat si damnum non ex culpa: `adducet illi testem' significat confirmatum id: `discerptum non rependet' significat non poenam: `et quando commodato petiverit vir ex socio suo' significat verum {4} ex alia prosapia: `et frangatur vel moriatur' significat damnum ei vel exstinctionem: `dominus ejus haud cum illo' significat si bonum illius veri non simul [in communi]: `rependendo rependet' significat restitutionem: `si dominus cum illo, non rependet' significat si bonum veri simul, quod non restitutio: `si mercenarius ille' significat si propter bonum lucri: `veniet in mercede sua' significat submissionem (c)et servitium. @1 intraverint altered to intraverit IT, intraverint IT, cp n. 9155$ @2 d vel i aut cp n. 9564$ @3 i cum IT$ @4 i and d et bonum A, i et bonum IT$