8825. Vers. 20-25. Et descendit Jehovah super montem Sinai ad caput montis, et vocavit Jehovah Moschen ad caput montis, et ascendit Moscheh. Et dixit Jehovah ad Moschen, Descende, obtestare populum ne forte perrumpant ad Jehovam ad videndum, et cadat de eo multus. Et etiam sacerdotes accedentes ad Jehovam sanctificabunt se, ne forte rupturam faciat in illis Jehovah. Et dixit Moscheh ad Jehovam, Non potest populus ascendere ad montem Sinai, quia Tu contestatus es in nos, dicendo, Terminos pone monti, et sanctifica eum. Et dixit ad illum Jehovah, Abi, descende, et ascendas tu et Aharon tecum, et sacerdotes et populus ne perrumpant ad ascendendum ad Jehovam, ne forte rupturam faciat in illis. Et descendit Moscheh ad populum, et dixit ad illos. `Et descendit Jehovah super montem Sinai' significat praesentiam Domini in caelo: `ad caput montis' significat in intimo: `et vocavit Jehovah Moschen ad caput montis, et ascendit Moscheh' significat conjunctionem veri a Divino ibi: `et dixit Jehovah ad Moschen' significat exhortationem a Divino: `Descende, obtestare populum ne forte perrumpant ad Jehovam ad videndum' significat ne illi qui a spirituali Ecclesia cupiant in caelum ubi Divinum caeleste: `et cadat de eo multus' significat quod sic perirent: `et etiam sacerdotes accedentes ad Jehovam sanctificabunt se' significat illos qui in bono spirituali, in quo Divinum, {1}quod obtegendi: `ne forte rupturam faciat in {2}illis Jehovah' significat inde separationem a bono: `et dixit Moscheh ad Jehovam' significat cogitationem veri a Divino: `Non potest populus ascendere ad montem Sinai' significat quod ad caeleste regnum nequeant se elevare: `quia Tu contestatus es in nos' significat quia a Divino cautum: `dicendo, Terminos ponas monti' significat per quod sphaera spiritualis boni infra desinat: `et sanctifica eum' significat quod sic ex Divino arceantur: `et dixit ad illum Jehovah' significat admonitionem usque: `Abi, descende' significat influxum: `et ascende tu et Aharon' significat conjunctionem cum vero a Divino, interno et externo: `et sacerdotes et populus ne perrumpant ad ascendendum ad Jehovam' significat ne qui in bono et vero spirituali cupiant in caelum caeleste: `ne forte rupturam faciat in illis' significat separationem a vero et bono: `et descendit Moscheh ad populum' significat influxum Divini per verum a Divino: `et dixit ad illos' significat sic admonitionem. @1 obtegent se$ @2 illos IT$