8785. Vers. 10-13. Et dixit Jehovah ad Moschen, Abi ad populum, et sanctifica illos hodie et cras, et lavent vestes suas. Et erunt parati ad diem tertium, quia in die tertio descendet Jehovah ad oculos omnis populi super montem Sinai. Et terminos ponas populo circumcirca, dicendo, Cavete vobis ascendere in montem et tangere extremitatem ejus; omnis tangens montem moriendo morietur. Non tangat illum manus, quia lapidando lapidabitur, aut jaculando jaculis conficietur; si bestia si vir non vivet; in trahendo jobel illi ascendent in montem. `Et dixit Jehovah ad Moschen' significat revelationem de praeparatione: `Abi ad populum' significat conjunctionem: `et sanctifica illos hodie et cras' significat obvelationem interiorum ut in fidei sancto appareant nunc et postea: `et lavent vestes suas' significat purificationem verorum: `et erunt parati ad diem tertium' significat praeparationem sic plenariam: `quia in die tertio' significat quoniam in fine cum praeparati ad recipiendum: `descendet Jehovah ad oculos omnis populi' significat adventum Domini et tunc illustrationem: `super montem Sinai' significat in bonum cui verum implantandum: `et terminos ponas populo circumcirca' (x)significat extensionem in caelum non ultra quam ad sphaeras spirituales boni: `dicendo, Cavete vobis ascendere in montem' significat quod omnino non ad societates caelestes quae in amore boni: `et tangere extremitatem ejus' (x)significat quod ne quidem ad intermedia: `omnis tangens montem moriendo morietur' significat quod qui ab Ecclesia spirituali usque ad societates caelestes se infundit pereat: `non tanget illum manus' significat quod qui per aliquam confidentiam sui [se] (x)infundunt: `quia lapidando lapidabitur' significat quod sic vera fidei quae eis, pereant: `et jaculando jaculis conficietur' significat quod etiam spirituale bonum [pereat]: `si bestia si vir non vivet' significat quod bonum et verum vitam spiritualem amittat: `in trahendo jobel' significat quibus perceptio communis boni caelestis: `illi ascendent in montem' significat extensionem usque ad caelestes.