8758. `Et castrametatus Israel juxta montem': quod significet dispositionem apud illos qui ab Ecclesia spirituali a bono Divino caelesti, constat ex significatione `castrametari' quod sit dispositio, ut supra n. 8757, ex repraesentatione `Israelis' quod sint qui ab Ecclesia spirituali, de qua etiam supra n. 8751, et ex significatione `montis' quod sit bonum amoris caelestis, de qua n. 4210, 6435, 8327. Per bonum Divinum caeleste intelligitur bonum Divinum in caelo, nam bonum Divinum, in se, est longe supra caelum.