8476. Vers. 19, 20. Et dixit Moscheh ad illos, Quisque ne residuum faciat de illo usque ad mane. Et non audiverunt ad Moschen, et residuum fecerunt viri ex illo usque ad mane, et vermiculavit vermes, et computruit; et succensuit super illos Moscheh. `Et dixit Moscheh ad illos' significat exhortationem: `Quisque ne residuum faciat de illo usque ad mane' significat quod non solliciti erunt de ejus acquisitione ex se: `et non audiverunt ad Moschen' significat non fidem, et inde non oboedientiam: `et residuum fecerunt viri ex illo usque ad mane' significat abusum boni Divini, quod ex se sibi id comparare vellent: `et vermiculavit vermes significat quod inde spurcum: `et computruit' significat inde infernale: `et succensuit super illos Moscheh' significat quod averterent inde a se verum Divinum.