7969. Vers. 35, 36. Et filii Israelis fecerunt secundum verbum Moschis, et petierunt ab Aegyptiis vasa argenti et vasa auri, et vestes. Et Jehovah dedit gratiam populi in oculis Aegyptiorum, et commodaverunt illis, et eripuerunt Aegyptiis. `Et filii Israelis fecerunt secundum verbum Moschis' significat quod oboedirent vero Divino: `et petierunt ab Aegyptiis vasa argenti et vasa auri, et vestes' significat scientifica veri et boni adempta malis qui ab Ecclesia, addicanda bonis qui inde: `et Jehovah dedit gratiam populi in oculis Aegyptiorum' significat timorem illorum qui damnati pro illis qui ab Ecclesia spirituali: `et commodaverunt illis' significat quod transferrentur: `et eripuerunt Aegyptiis' significat quod qui in damnatione a talibus prorsus devastati essent.