7955. `Et vocavit Moschen et Aharonem noctu': quod significet affluxum veri a Divino in statu illo, constat ex significatione `vocavit' quod sit praesentia et influxus, de qua n. 6177, 6840, 7390, 7451, 7721, hic affluxus, quia dicitur de illis qui in statu damnationis, hoc est, qui in statu meri falsi ex malo; illi non interius aliquem influxum veri et boni recipere possunt, sed exterius, quod est affluxus; ex repraesentatione `Moschis et Aharonis' quod sit verum a Divino, de qua n. 6771, 6827; verum a Divino dicitur, non verum Divinum, quia praedicatur de illis qui in damnatione; et ex significatione `noctu' quod sit status damnationis, de qua supra n. 7851, 7870.