7792. Vers. 9, 10. Et dixit Jehovah ad Moschen, Non audiet ad vos Pharao; propterea ut multiplicari prodigia Mea in terra Aegypti. Et Moscheh et Aharon fecerunt omnia prodigia illa coram Pharaone; et obfirmavit Jehovah cor Pharaonis, et non dimisit filios Israelis e terra sua. `Et dixit Jehovah ad Moschen' significat informationem: `Non audiet ad vos Pharao' significat non oboedientiam: `propterea ut multiplicari prodigia Mea in terra Aegypti' significat ut confirmentur quod in nulla fide fuerint, sed in malo: `et Moscheh et Aharon fecerunt omnia prodigia illa coram Pharaone' significat quod vastationes illae, et inde confirmationes quod in malo sint, factae sint per verum procedens a Divino: `et obfirmavit Jehovah cor Pharaonis' significat quod se obstinarent: `et non dimisit filios Israelis e terra sua' significat quod non relinquerent illos qui ab Ecclesia spirituali.