Vers. 1-3. Et dixit Jehovah ad Moschen, Adhuc plagam unam adducam super Pharaonem, et super Aegyptum; post ita dimittet vos abhinc; sicut dimittere illum omne, expellendo expellet vos abhinc. Dic age in auribus populi, et petant vir ex socio suo, et mulier ex socia sua, vasa argenti et vasa auri. Et dedit Jehovah gratiam populi in oculis Aegyptiorum; etiam vir Moscheh magnus valde in terra Aegypti, in oculis servorum Pharaonis, et in oculis populi. `Et dixit Jehovah ad Moschen' significat instructionem: `Adhuc plagam unam adducam super Pharaonem, et super Aegyptum' significat finem vastationis, qui damnatio: `post ita dimittet vos abhinc' significat quod tunc relinquentur: `sicut dimittere illum omne, expellendo expellet vos abhinc' significat quod relinquent plane, ac aversabuntur et fugient praesentiam illorum: `dic age in auribus populi' significat informationem et oboedientiam: `et petant vir ex socio suo, et mulier ex socia sua, vasa argenti et vasa auri' significat quod scientifica veri et boni, adempta malis qui fuerunt ab Ecclesia, addicanda erunt bonis qui inde: `et dedit Jehovah gratiam populi in oculis Aegyptiorum' significat timorem illorum qui in malis pro illis qui ab Ecclesia spirituali, propter plagas: `etiam vir Moscheh magnus valde in terra Aegypti' significat respectum pro vero Divino nunc: `in oculis servorum, et in oculis populi' significat apud illos qui ibi in subordinatione erant.