6509. Vers. 4-6. Et transiverunt dies fletus ejus; et locutus Joseph ad domum Pharaonis, dicendo, Si quaeso inveni gratiam in oculis vestris, loquimini quaeso in auribus Pharaonis, dicendo. Pater meus adjuravit me, dicendo, Ecce ego morior, in sepulcro meo, quod fodi mihi in terra Canaan, ibi sepelias me; et nunc ascendam quaeso, et sepeliam patrem meum, et revertar. Et dixit Pharaoh, Ascende et sepeli patrem tuum, quemadmodum adjuravit te. `Et transiverunt dies fletus ejus' significat quod status maestitiae transacti sint: `et locutus Joseph ad domum Pharaonis' significat influxum interni in mentem naturalem: `dicendo, Si quaeso inveni gratiam in oculis vestris' significat ut bene recipiatur: `loquimini quaeso in auribus Pharaonis, dicendo' significat sollicitationem ut consentiat: `Pater meus adjuravit me' significat quod Ecclesia cordi sit: `dicendo, Ecce ego morior' significat quod desiit esse: `in sepulcro meo, quod fodi mihi in terra Canaan, ibi sepelias me' significat quod resuscitanda ubi prior fuerat: `et nunc ascendam quaeso, et sepeliam patrem meum' significat resuscitationem Ecclesiae ibi ab interno: `et revertar' significat praesentiam in mente naturali: `et dixit Pharaoh, Ascende et sepeli patrem tuum' significat affirmationem ut resuscitetur Ecclesia: `quemadmodum adjuravit te' significat quia illa cordi.