5851. Spiritus iidem non manent perpetuo apud hominem, sed secundum status hominis, nempe ejus affectionis seu amoris et finium, mutantur; priores removentur et alii succedunt; in genere tales spiritus apud hominem sunt qualis ipse homo est; si avarus est, sunt spiritus qui avari, si fastuosus, sunt spiritus qui fastuosi, si vindictae cupidus, sunt spiritus qui tales, si dolosus, sunt spiritus similes; homo sibi arcessit spiritus ex inferno secundum vitam. Sunt inferna exactissime distincta secundum mala cupiditatum, et secundum omnes differentias mali; inde nusquam deest quin similes evocentur et adjungantur homini qui in malo.