3972. `Et dixit Jacob ad Laban': quod significet veri naturalis bonum ad bonum collaterale ab origine Divina, per quod conjunctio interiorum, constat ex repraesentatione `Jacobi' quod sit veri naturalis bonum, de qua n. 3659, 3669, 3677, 3775, 3829; et ex repraesentatione `Labanis' quod sit bonum collaterale ab origine Divina, de qua n. 3612, 3665, 3778; quod conjunctio interiorum fiat per illud bonum, prius aliquoties explicatum est, videatur n. 3665, 3690, et alibi: hoc bonum etiam est quod significatur per `gregem Labanis,' per quem Jacob sibi suum gregem comparavit, de quibus in sequentibus.