3811. Vers. 14, 15. Et dixit ei Laban, Utique os meum, et caro mea tu; et habitavit cum eo mensem dierum. Et dixit Laban Jacobo, Num quia frater meus tu, et servires mihi gratis, indica mihi quid merces tua? `Dixit ei Laban, Utique os meum, et caro mea tu significat conjuncta quoad vera et quoad bona: `et habitavit cum eo mensem dierum' significat vitae statum novum: `et dixit Laban Jacobo, Num quia frater meus tu' significat quia consanguinei ex bono: `et servires mihi gratis, indica mihi quid merces tua' significat quod erit medium conjunctionis.