2926. Vers. 7, 8. Et surrexit Abraham, et incurvavit se populo terrae, filiis Heth. Et locutus cum illis, dicendo, Si est cum anima vestra ad sepeliendum mortuum meum a coram me, audite me, et intercedite mihi apud Ephronem filium Zohar. `Surrexit Abraham et incurvavit se' significat gaudium Domini propter benignam receptionem: `populo terrae, filiis Heth' significat ab illis qui ab Ecclesia nova spirituali: `locutus cum illis, dicendo' significat cogitationem et perceptionem de illis: `si est cum anima vestra' significat si ex affectione veri ex corde: `ad sepeliendum mortuum meum a coram me' significat quod ex nocte emergere et resurgere vellent: `audite me' significat ut obtemperarent: `et intercedite mihi apud Ephronem filium Zohar' significat illos apud quos verum et bonum fidei recipi posset.