2711. Vers. 21. Et habitavit in deserto Paran; et accepit illi mater ejus uxorem e terra Aegypti. `Habitavit in deserto Paran' significat vitam spiritualis hominis quoad bonum; `desertum' est hic, ut prius, obscurum respective; `Paran' est illuminatio ex Divino Humano Domini: `et accepit illi mater' significat affectionem veri: `uxorem e terra Aegypti' significat affectionem scientiarum quae spiritualis Ecclesiae homini.