CAPUT XXXVII 1. Et fecit Bezaleel arcam lignis schittim, duo cubiti et dimidius longitudo ejus, et cubitus et dimidius latitudo ejus, et cubitus et dimidius altitudo ejus. 2. Et obduxit eam auro puro ab intra et ab extra, et fecit ei limbum auri circumcirca. 3. Et fudit illi quattuor annulos auri super quattuor angulis ejus; et duo annuli super costa ejus una, et duo annuli super costa ejus altera. 4. Et fecit vectes lignis schittim, et obduxit illos auro. 5. Et induxit vectes in annulos super costis arcae ad portandum arcam. 6. Et fecit propitiatorium auro puro, duo cubiti et dimidius longitudo ejus, et cubitus et dimidius latitudo ejus. 7. Et fecit duos cherubos auro, solidum fecit illos a duabus extremitatibus propitiatorii. 8. Cherubus unus ab extremitate hinc, et cherubus unus ab extremitate illinc; ex propitiatorio fecit cherubos a duabus extremitatibus ejus. 9. Et erant cherubi expandentes alas sursum, protegentes alis suis super propitiatorium, et facies illorum vir ad fratrem suum, ad propitiatorium erant facies cheruborum. 10. Et fecit mensam lignis schittim, duo cubiti longitudo ejus, et cubitus latitudo ejus, et cubitus et dimidius altitudo ejus. 11. Et obduxit illam auro puro, et fecit illi limbum auri circumcirca. 12. Et fecit illi clausuram palmi circumcirca, et fecit limbum auri clausurae ejus circumcirca. 13. Et fudit illi quattuor annulos auri, et dedit annulos super quattuor angulis, qui quattuor pedibus ejus. 14. E regione clausurae erant annuli receptacula vectibus ad portandum mensam. 15. Et fecit vectes lignis schittim, et obduxit illos auro ad portandum mensam. 16. Et fecit vasa quae super mensa, scutulas ejus, et acetabula ejus, et scutellas ejus, et scopulas ejus, quibus integeretur, auro puro. 17. Et fecit candelabrum auro puro, solidum fecit candelabrum, crus ejus, et calamus ejus, scyphi ejus, malogranata ejus, et flores ejus, ab eo erant. 18. Et sex calami exeuntes ex lateribus ejus; tres calami candelabri e latere ejus uno, et tres calami candelabri e latere ejus altero. 19. Tres scyphi amygdalati in calamo uno, malogranatum et flos; et tres scyphi amygdalati exeuntes e calamo uno, malogranatum et flos; ita sex calamis exeuntibus e candelabro. 20. Et in candelabro quattuor scyphi amygdalati, malogranata ejus et flores ejus. 21. Et malogranatum sub duobus calamis ex eo, et malogranatum sub duobus calamis ex eo, et malogranatum sub duobus calamis ex eo, sex calamis exeuntibus ex eo. 22. Malogranata illorum et calami illorum ex eo erant, totum illud solidum unum auro puro. 23. Et fecit lucernas ejus septem, et forcipes ejus et trullas ejus, auro (x)puro. 24. Talento auri puri fecit illud, et omnia vasa ejus. 25. At fecit altare suffitus lignis schittim, cubitus longitudo ejus, et cubitus latitudo ejus, quadratum, et duo cubiti altitudo ejus; ex eo erant cornua ejus. 26. Et obduxit illud auro puro, tectum ejus, et parietes ejus circumcirca, et cornua ejus, et fecit ei limbum auri circumcirca. 27. Et duos annulos auri fecit ei desub limbo ejus super duabus costis ejus, super duobus lateribus ejus, ad receptacula vectibus, ad portandum id in illis. 28. (x)Et fecit vectes lignis schittim, et obduxit illos auro. 29. Et fecit oleum unctionis sanctum, et suffimentem aromatum purum opere aromatarii.