10573. Vers. 18-23. Et dixit, Fac videre mihi quaeso gloriam Tuam. Et dixit, Ego pertransire faciam omne bonum Meum super facies tuas, et invocabo nomen Jehovae coram te, et gratiam faciam cui gratiam facio, et misericordiam faciam cui misericordiam facio. Et dixit, Non potes videre facies Meas, quia non videt Me homo et vivit. Et dixit Jehovah Ecce locus Mecum, et stabis super petra. Et erit, in pertransire gloria Meam, et ponam te in fissura petrae, et obtegam volam Meam super te usque dum pertransivero. Et removebo volam Meam, et videbis posteriora Mea, et facies Meae non videbuntur. `Et dixit, Fac videre mihi quaeso gloriam Tuam' significat apperceptionem Divini Veri interni in externo `et dixit, Ego pertransire faciam omne bonum Meum super facies tuas, significat omne Divinum caeli et Ecclesiae super externum [separatur ab interno, in quo Moscheh et gens cui praeerat]: `et invocabo nomen Jehovae coram te' significat sanctum cultus Divini ibi: `et gratiam faciam cui gratiam facio, et misericordiam faciam cui misericordiam facio' significat quod Divinum Verum et Bonum revelabitur illis qui recipiunt `et dixit, Non potes videre facies Meas' significat quod Divina interior Ecclesiae, cultus, et Verbi non apparere possint genti Israeliticae: `quia non videt Me homo et vivit significat quod ipsum Divinum non videri possit quale in Se est, sed quale per Dominum in caelo: `et dixit Jehovah Ecce locus Mecum, et stabis super petra' significat statum fidei in Deum `et erit in pertransire gloriam Meam' significat interiora Verbi, Ecclesiae et cultus: `et ponam te in fissura petrae' significat obscurum et falsum fidei, quale illis qui in externis absque interno sunt: `et obtegam volam Meam super te, usque dum pertransivero' significat occlusionem interni et removebo volam Meam, et videbis posteriora Mea, et facies Meae non videbuntur' significat quod externa Verbi, Ecclesiae, et cultus visuri, non autem interna.