1031. Vers. 11. Et ergo foedus Meum vobiscum, et non excidetur omnis caro amplius ab aquis diluvii; et non erit amplius diluvium ad perdendum terram. 'Et erigo foedus Meum vobiscum' significat praesentiam Domini apud quoscumque quibus charitas; seque refert ad 'egredientes ex arca' et ad 'omnem feram terrae,' hoc est, ad homines intra Ecclesiam et ad homines extra Ecclesiam: 'et non excidetur omnis caro amplius ab aquis diluvii' significat quod non perituri sicut ultima posteritas Antiquissimae Ecclesiae: 'et non erit amplius diluvium ad perdendum terram' significat quod talis persuasio lethifera et suffocativa non existet.