424. I. Quod non sciatur qualis est Amor scortatorius, nisi scitur qualis est Amor conjugialis.{1} Per amorem scortatorium intelligitur Amor adulterii qui destruit amorem conjugialem, ut supra n. 423. Quod non sciatur qualis est Amor ille scortatorius, nisi scitur qualis est Amor conjugialis, non eget demonstrare, sed modo illustrare per similitudines; ut, quis potest nosse quid malum et falsum, nisi scit quid bonum et verum; et quis novit quid incastum, inhonestum, indecorum, et impulchrum, nisi scit quid castum, honestum, decorum, et pulchrum; et quis potest discernere insanias, nisi qui sapiens est, aut scit quid sapientia; tum quis potest rite percipere stridores disharmonicos, nisi qui doctrina et studio hausit numeros harmonicos; similiter quis potest perspicere quale est adulterium, nisi perspexerit quale est conjugium; et quis potest judicio sistere spurcitiem voluptatum amoris scortatorii, nisi qui prius judicio suo stitit munditiem amoris conjugialis: nunc quia absolvi Delitias sapientiae de Amore conjugiali, ex intelligentia inde acquisita possum Voluptates de Amore scortatorio describere. @1. Prima editio: conjugialis (absque puncto)$