9910. Vers. 31-35. Et facies pallium ephodi totum hyacinthino. Et erit os capitis ejus in medio ejus; labrum erit ori ejus circumcirca, opus textoris, sicut os loricae erit illi ne laceretur. Et facies super fimbrias ejus malogranata hyacinthini, et purpurae, et coccinei dibaphi super fimbrias ejus circumcirca, et tintinnabula auri in medio illorum circumcirca. Tintinnabulum auri et malogranatum, tintinnabulum auri et malogranatum, super fimbrias pallii circumcirca. Et erit super Aharone ad ministrandum, et audietur vox ejus in intrando illo ad sanctum coram Jehovah, et in exeundo illo, ne moriatur. `Et facies pallium {1}' significat Divinum Verum in forma interna in regno spirituali: `totum hyacinthino' significat per influxum ex bono {2} regni caelestis: `et erit os capitis ejus in medio ejus' significat rationem influxus a superiore: `et labrum erit ori ejus circumcirca significat undequaque terminatum et clausum: `opus textoris' significat ex caelesti: `et os loricae erit illi ne laceretur' significat ita validum et tutum a damno: `et facies super fimbrias ejus' significat in extremis ubi naturale: `malogranata' significat scientifica boni: `hyacinthini, et purpurae, et coccinei dibaphi' significat ex bono charitatis et fidei: `super fimbrias ejus circumcirca' significat in extremis, ubi naturale, undequaque: `et tintinnabula auri' significat omnia doctrinae et cultus ex bono transeuntia ad illos qui ab Ecclesia: `in medio illorum circumcirca' significat ex interiore scientificorum boni undequaque: `tintinnabulum auri et malogranatum, tintinnabulum auri et malogranatum, super fimbrias pallii circumcirca' significat sic ubivis omnino: `et erit super Aharone' significat repraesentativum Domini {3}: `ad ministrandum' significat dum in cultu et evangelizatione: `et audietur vox ejus' significat influxum veri apud illos qui in caelis et qui in terris: `in intrando illo ad sanctum coram Jehovah, et in exeundo (illo)' significat in omni statu boni et veri in cultu: `ne moriatur' significat ne repraesentativum pereat, et sic conjunctio cum caelis. @1 Ephodi$ @2 i externo$ @3 i, quoad omne opus salvationis$