9840. Vers. 9-14. Et accipies duos lapides schoham, et sculpes super illis nomina filiorum Israelis. Sex de nominibus illorum super lapide uno, et nomina sex reliqua super lapide altero, secundum generationes illorum. Opere opificis lapidis, sculpturis sigilli sculpes duos lapides super nominibus filiorum Israelis; circumdatos fundis auri facies illos. Et pones duos lapides super umeris ephodi, lapides recordationis filiis Israelis, et feret Aharon nomina illorum coram Jehovah super duobus umeris ejus ad recordationem. Et facies fundas auri. Et duas catenulas auri puri, a terminis facies illas, opere funiculi; et dabis catenulas funiculorum super fundis. `Et accipies duos lapides schoham' (x)significat memoriam interiorem quae ex veris fidei quae ex amore: `et sculpes super illis nomina filiorum Israelis' significat cui impressa sunt vera et bona regni spiritualis quoad omne quale eorum: `sex de nominibus illorum super lapide uno' significat omne quale verorum ex bono: `et nomina sex reliqua super lapide altero' significat [omne] quale verorum per quae bonum: `secundum generationes illorum' significat utrumque eo ordine quo gignitur et procedit unum ab altero: `opere opificis lapidis, sculpturis sigilli, sculpes duos lapides super nominibus filiorum Israelis' significat formam caelestem omnium veritatum in suo ordine in memoria ex bono amoris, ita intellectualia ibi secundum ordinationem a voluntario apud regeneratum: `(x)circumdatos fundis auri facies illos' significat existentiam et subsistentiam a bono: `et pones duos lapides super umeris ephodi' significat conservationem boni et veri omni opera et potentia: `lapides recordationis filiis Israelis' significat ex misericordia in perpetuum regno spirituali: `et feret Aharon nomina illorum coram Jehovah super duobus umeris ejus ad recordationem' significat repraesentativum Divinae conservationis boni et veri in perpetuum ex misericordia: `et facies fundas auri' significat existentiam et subsistentiam ex bono continuam: `et duas catenulas auri puri' significat cohaerentiam cum bono totius regni: `a terminis facies illas' significat ab extremis per quae influxus: `opere funiculi' significat modum conjunctionis: `et dabis catenulas funiculorum super fundis' significat conjunctionem cum bono ex quo vera, et sic conservationem regni spiritualis omni opera et potentia.