Vers. 1-7. Et dixit Jehovah ad Moschen, Vide, dedi te deum Pharaoni, et Aharon frater tuus erit propheta tuus. Tu loqueris omne quod praecepero tibi; et Aharon frater tuus loquetur ad Pharaonem, et mittat filios Israelis e terra sua. Et Ego obdurabo cor Pharaonis, et multiplicabo signa Mea et prodigia Mea, in terra Aegypti. Et non audiet ad vos Pharao; et dabo manum Meam in Aegyptios, et educam exercitus Meos, populum Meum, filios Israelis, e terra Aegypti, judiciis magnis. Et cognoscent Aegyptii quod Ego Jehovah, in extendere Me manum Meam super Aegyptios, et eduxero filios Israelis e medio illorum. Et fecit Moscheh et Aharon, quemadmodum praecepit Jehovah illis, ita fecerunt. Et Moscheh filius octoginta annorum, et Aharon filius trium et octoginta annorum, in loqui illos ad Pharaonem. `Et dixit Jehovah ad Moschen' significat instructionem: `Vide, dedi te deum Pharaoni' significat legem Divinam et ejus potentiam super illos qui in falsis: `et Aharon frater tuus erit propheta tuus' significat doctrinam inde: `tu loqueris omne quod praecepero tibi' significat receptionem influxus Divini et communicationem: `et Aharon frater tuus loquetur ad Pharaonem' significat receptionem influxus inde et communicationem cum illis qui in falsis: `et mittat filios Israelis' significat ut recedant ab infestatione: `et Ego obdurabo cor Pharaonis' significat obstinationem a malo falsi: `et multiplicabo signa Mea et prodigia Mea' significat admonitiones omnis generis, nec aliquid deerit: `in terra Aegypti' significat ubi illi qui infestant: `et non audiet ad vos Pharao' significat quod non recepturi qui in falsis: `et dabo manum Meam in Aegyptios' significat quod ideo per Divinam potentiam adigentur: `et educam exercitum Meum, populum Meum, filios Israelis' significat quod liberandi qui in bonis et veris: `e terra Aegypti' significat ab infestationibus: `judiciis magnis' significat secundum leges ordinis: `et {1}cognoscant Aegyptii quod Ego Jehovah' significat quod timorem habebunt pro Divino: `in extendere manum Meam super Aegyptios' significat cum potentiam Divinam in se animadvertunt: `et eduxero filios Israelis e medio illorum' significat et cum videbunt liberari illos qui ab Ecclesia spirituali: `et fecit Moscheh et Aharon, quemadmodum praecepit Jehovah, ita fecerunt' significat quod quae dicta etiam facta sint: `et Moscheh filius octoginta annorum' significat statum et quale legi' a Divino: `et Aharon filius trium et octoginta annorum' significat statum et quale doctrinae: `in loqui illos ad Pharaonem' significat cum illa mandata sunt. @1 cognoscent I$