5915. `Et sustentabo te ibi': quod significet continuum influxum vitae spiritualis a caelesti interno, constat ex significatione `sustentare' cum dicitur a `Josepho' per quem repraesentatur caeleste internum, quod sit influxus vitae spiritualis a caelesti interno; `sustentatio' in spirituali sensu non aliud est quam influxus boni et veri per caelum a Domino, inde {1} sustentantur angeli, et {2} inde sustentatur anima hominis, hoc est, internus ejus homo; huic sustentationi correspondet sustentatio externi hominis per cibum et potum; quapropter per `cibum' significatur bonum, et per `potum' verum; talis etiam est correspondentia ut cum vescitur homo cibo, angeli apud illum in idea de bono et vero sint; et quod mirum, cum differentia secundum cibi species; quapropter cum homo in Sancta Cena accipit panem et vinum, angeli apud illum in idea de bono amoris et de bono fidei sunt, n. 3464, 3735, ex causa quia `panis' correspondet bono amoris et `vinum' bono fidei; et quia correspondent, etiam eadem significant in Verbo. [2] Quod per cibum et potum spiritualem, hoc est, per bonum et verum, sustentetur anima hominis, hoc est, internus {3} homo, constat {4}a Domini verbis apud Mosen, Non per panem solum vivit homo, sed per omne enuntiatum oris Jehovae vivit homo, Deut. viii 3, Matth. iv 4;