5261. Vers. 25-27. Et dixit Joseph ad Pharaonem, Somnium Pharaonis unum illud, quod Deus faciens indicavit Pharaoni. Septem vaccae bonae septem anni eae, et septem aristae bonae septem anni illae; somnium unum illud. Et septem vaccae graciles et malae ascendentes post eas, septem anni eae; et septem aristae vacuae, exustae euro, erunt septem anni famis. `Et dixit Joseph ad Pharaonem' significat perceptionem naturalis e caelesti spiritualis: `somnium Pharaonis unum illud' significat simile in utroque {1}quod praevisum: `quod Deus faciens indicavit Pharaoni' significat quid {2}provisum quod appercipere datum naturali: `septem vaccae bonae septem anni eae' significat status multiplicationis veri in interiore naturali: `et septem aristae bonae septem anni illae' significat status multiplicationis veri in exteriore naturali: `somnium unum illud' significat quod utrumque erit per conjunctionem: `et septem vaccae graciles et malae ascendentes post eas, septem anni eae' significat status multiplicationis falsi infestantis interius naturale: `et septem aristae vacuae, exustae euro' significat status multiplicationis falsi infestantis exterius naturale: `erunt septem anni famis' significat inde defectum et privationem veri apparentem. @1 quoad I$ @2 praevisum I$